“මේක හරිම ලස්සන විමානයක්. පළිඟු මැණික්වලින් තමයි බිත්ති හැදිල තියෙන්නෙ. රන් රිදී දැල් වටේට එල්ලෙනවා. සුරම්‍ය වූ විචිත්‍ර වූ මුදුන් තියෙන තොරණ් හදල තියෙන විදිහත් හරිම අපූරුයි. මිදුල පුරා රන්වන් වැලි විසිරිලා තියෙනවා. සරත් කාලයේ අහස් කුස හිරු නැඟෙනවා. එතකොට දස දිසාවම හරි එළියයි. දහසක් හිරු රැසින් අඳුර දුරුවෙලයි තියෙන්නෙ. ඔබේ විමානයත් ඒ වගේ. ඒ විදිහටම රැස් විහිදෙනවා. රෑ අහස් කුසේ දිළිහි දිළිහී තියෙන ගිනි දැල්ලක් වගේ. අහසෙහි පිහිටල තියෙන ඔබේ ඔය විමානය විදුලි එළියක් දකිනවා වගේ. දෙනෙත් මුසපත් කරවනවා.

මේ විමානයේ වීණා, මිහිඟු බෙර, අත්පොළන හඬ, කස්තල නාදවලින් ගිගුම් දෙනවා. සියලු සැපය පිරුණු ඉන්ද්‍ර පුරය වගේ. ඔය දිව්‍ය විමානයේ නෙළුම්, කුමුදු, මහනෙල්, රතුමහනෙල්, ආදී මල්වර්ගත් තියෙනවා. සීනිද්ද මල්, බඳුවදමල් ආදියත් තියෙනවා. සල් මල්, අසෝක මල් පිරුණු ගසුත් තියෙනවා. හැමතැනම හමන්නේ උතුම් ගස්වලින් එන සුවඳයි.

යසස් ඇති දෙව්දුව, ඔබට පහළ වෙලා තියෙනවා සුන්දර පැන් පොකුණු. ඒ පොකුණු ඉවුරෙහි හොර ගස්, දෙල්ගස්, භුජක ගස් පලතුරු පිරුණු ගස් වර්ග ලස්සන වැල් වර්ග පිරිල තියෙනවා. පොකුණෙහි පැන් පෙනෙන්නෙත් නිල් මැණික් දැලක් වගේ. වතුරෙහි හටගන්න හැම මල් ජාතියක්ම මෙහි තියෙනවා. පොළොවේ හැදෙන හැම රුක් ජාතියක්ම තියෙනවා. මිනිස් ලොවේ ඇති නොමිනිස් ලොවේ ඇති දෙව්ලොවේ ඇති හැමදෙයක්ම ඔබේ විමානයෙහි පහළ වෙලා තියෙනවා.

පින්වත් දෙව්දුව, මොන වගේ සංවරකමක්ද, මොන වගේ ඉන්ද්‍රිය දමනයක්ද මේ පුණ්‍යවිපාකයට හේතු වුනේ. ඔබට කොහොමද මෙවැනි දිව්‍ය විමානයක් පහළ වුනේ? කොහොමද මෙතරම් උදාර වූ සැප සම්පත් ලැබුනේ කියල අපට කියනවද?”

“මගේ මේ දිව්‍ය විමානයේ කොස්වා ළිහිණියනුත් ඉන්නවා. මොණර රංචුත් ඉන්නවා. ඇටිකුකුළු රංචුත් ඉන්නවා. දිව්‍යමය වූ දියකාවොත් ඉන්නවා. හංසරාජයොත් ඉන්නවා. කොවුලන්ගේ මිහිරි නාදයෙන් හැම විටම සුන්දර වෙනවා. නොයෙක් වර්ගයේ විසිතුරු මල් වර්ග, ගස් වර්ග ඒ වගේම පලොල් දඹ අසෝක ආදී ගසුත් පිරිල තියෙනවා. මට මෙවැනි සුන්දර විමානයක් තමයි පහළ වෙලා තියෙන්නෙ. පින්වත් ස්වාමීනි, මං දැන් ඒ ගැන ඔබ වහන්සේට කියන්නම්. අසනු මැනැව.

පින්වත් ස්වාමීනි, මගධ රටෙහි පෙරදිග පැත්තට වෙන්ට නාලක කියල ගමක් තියෙනවා. මං ඉස්සර හිටියේ ඒ නාලක ගමේ. මං ඒ ගමේ හිටපු ලේලියක්. ඒ කාලෙ මට කිව්වෙ සේසවතී කියල. සැරියුත් මහරහතන් වහන්සේ පිරිනිවන් පෑවා. ඒ ගුණස්කන්ධය නම් අප්‍රමාණයි. දෙවිමිනිසුන් උන්වහන්සේව පුද දුන්නා. බුහුමන් කළා. ධර්ම අර්ථ විග්‍රහ කරන්න අතිශයින්ම දක්ෂයි. ඒ ගුණය ගැන මං හරියට සතුටු වුනා. උන්වහන්සේගේ ඒ සිරුරට මං සුවඳ මල් පූජා කළා. උන්වහන්සේ අන්තිමදේහ දැරුවා. උදාර සෘෂිවරයෙක්. අනුපාදිසේස පරිනිර්වාණයට පත්වුනා.

මං උන්වහන්සේට මල් පූජා කරලයි මිනිස් සිරුර අත්හැර මේ තව්තිසාවට ආවෙ. “