පින්වත් දෙව්දුව, ඔබේ මේ ඇත් වාහනය උත්තම එකක්. නොයෙක් මැණික්වලින් මේ ඇතාව සරසලයි තියෙන්නේ. හරිම සිත්කලුයි. ශක්ති සම්පන්නයි. වේගවත් ගමනක් තියෙන්නේ. අහසින් ගමන් කරන්නේ.

පින්වත් දෙව්දුව, ඔබේ ඇස් පවා නෙළුම් පෙති වගේ. මේ ඇතා බබලන්නෙත් නෙළුම්, මහනෙල් පාටිනුයි. නෙළුම් රේණුවලින් මේ ඇතාගේ ඇඟ වැහෙනකම්ම සැරසිලා තියෙනවා. රනින් කළ නෙළුම් මල් මාලාවන් මේ ඇතා පැළඳගෙන ඉන්නවා.මේ ඇතා ගමන් කරන්නේ නෙළුම් පිරුණු මාවතක. ඒ නෙළුම් පත්වලින් මේ මාවත බබලනවා. සුන්දර විදිහට මේ ඇතා පා තබමින් යන හැටි හරිම අපූරුයි. ඒ ඇත් වාහනය ගමන් කරද්දී මිහිරි නාදය පැතිරෙනවා. රනින් කළ සීනුවලිනුයි ඒ නාදය පැතිරෙන්නේ. පංචාංගික තූර්ය නාදය වගේම එය සුන්දරයි.

මේ ඇත් රජාගේ පිට උඩ ඉන්න ඔබ දිව්‍ය සළුපිළිවලින් ලස්සනට සැරසිලයි ඉන්නේ. ඔබව පිරිවරාගත් අනෙක් දිව්‍ය අප්සරාවන්ටත් වඩා සුන්දරත්වයෙන් බබලන්නේ ඔබමයි.

ඔබේ මේ පුණ්‍ය විපාකය ලැබුවේ දානයක් පූජා කරලාද? එහෙම නැත්නම් උතුම් සීලයක් රැකලාද? එහෙමත් නැත්නම් ඇඳිලි බැඳ වන්දනා කොට රැස් කළ පිනක්ද? මේ අහන කරුණට පිළිතුරු දෙනු මැනැව.

මොග්ගල්ලාන මහරහතන් වහන්සේ තමයි මේ ප්‍රශ්න ඇහුවේ. ඒ ගැන ඒ දෙව්දුව ගොඩාක් සතුටු වුනා. මොන වගේ පින්කම්වලින්ද මේ සැප ලැබුනේ කියන ප්‍රශ්නයට ඇය මෙහෙමයි පිළිතුරු දුන්නේ.

මං සත්පුරුෂයන් වහන්සේ නමක් දැක්කා. උන්වහන්සේ ගුණ සම්පන්නයි. ධ්‍යාන වඩනවා. ධ්‍යානයෙහි ඇලී වසනවා. ඉතින් මං ලස්සනට මල් අතුරලා අලුත් පිරුවටයකින් සරසලා ආසනයක් පිළියෙල කරලා උන්වහන්සේට පූජා කළා.

ඒ ආසනය වටේ බිම ලස්සනට නෙළුම් මල් මාලාවන් තැන්පත් කළා. නෙළුම් මල් පෙති ලස්සනට විසිරුවා දැම්මෙත් මේ අත්වලින්මයි.

ඒ කුසල කර්මයේ විපාක වශයෙන් තමයි මෙවැනි සම්පතක් ලැබුනේ. දැන් දෙවිවරු මට සත්කාර කරනවා. ගෞරව කරනවා. පුදනවා.

ඇත්තෙන්ම යම්තාක් අවබෝධයෙන්ම කෙලෙසුන්ගෙන් නිදහස් වුන ශාන්ත ජීවිත ඇති බ්‍රහ්මචාරීන් වහන්සේලා කෙරෙහි සිත පහදවා ගන්නවා නම්, ආසනයක් පූජා කරගන්නවා නම්, එබඳු කෙනෙකුට මට වගේම දිව්‍ය සම්පත් ලබාගෙන සතුටු වෙන්න පුළුවනි.

අන්න ඒ නිසා තමන්ගේ යහපත කැමැති පුණ්‍ය විපාක ලබන්න මහත් ආශා ඇති කෙනා අන්තිම දේහ දරා වැඩසිටින ඒ රහතන් වහන්සේලාට ආසනයක්මයි පූජා කරගන්න ඕන.